話咁快,本周五又到中秋!

粵諺有云:八月十五是中秋,有人快活有人愁。呢句話出自何年何處,已經無從稽考,但究竟邊個係最快活,我亞貴或者可以話你知。

答案咪係我哋啲酒樓老闆囉。

以前嘅香港,中秋節係非常之有特色,節日氣氛好濃厚。老香港應該記得,當年喺彌敦道一帶酒樓嘅巨型月餅花牌,係城中一大特色,張燈結綵,出盡心思,畫功一流,非常之吸引。酒樓點解落咁重本宣傳月餅生意呢?因為賣一季月餅,已夠晒酒樓一年嘅皮費,利潤之高可謂非常驚人。

50至70年代嘅香港人,當年對月餅更有一種期待,因為那些年生活物質缺乏,連買月餅都要做月餅會,按月供款,到中秋前去酒樓提取月餅係一件大事也,如果分到有蛋黃嘅月餅就更加開心到震,食一口更感美味。

江湖傳聞,當年香港女首富小甜甜老公,將月餅切開12小塊俾員工吃,真係孤寒之最,但亦可見月餅以前多麼矝貴。

相傳月餅嘅出現,本來是用來傳訊息,推翻蒙古人統治嘅工具,但喺大陸改革開放後,月餅竟成了貪官受賄嘅工具,月餅盒放嘅唔係月餅而是人仔鈔票,真係匪夷所思。

近年習大大打貪之下,月餅銷售已大不如前,但月餅呢味傳統食物,乃係中秋佳節必備,有時甲送給乙,乙送給丙,一直循環不斷咁轉送,有啲連盒蓋都未開,竟變成垃圾。報載每年有過千萬個月餅丟到堆填區,真是作孽不淺,好折墮。

華人移咗民到花旗,中秋倍思鄉,反而更重視購買月餅,唔食都要買一兩盒送禮自用。

去年中秋,喺大埠一間M字尾嘅名牌蛋糕店推出月餅,有居美港人買咗之後,發現竟然係老牌餅店奇華代工,於是要求回水,真係笑死我亞貴。嗱,今次就真係阿茂整餅,竟然有人儍到為咗名氣,花多幾倍價錢,向唔係做月餅嘅蛋糕店買月餅,真是咎由自取。

食月餅,係應節,但好多人指月餅高糖份、高脂肪,對身體百害而無一利,吃月餅等於吃鹹蛋黃、蓮蓉、果醬、豬油落肚!多鳩餘啦,一年才食一兩個月餅,點會有問題?我亞貴最愛就係傳統嘅雙黃蓮蓉月,想起也流口水。

我要留言

請輸入你的評論!
請在這裡輸入你的名字