香港當前呢場未見盡頭嘅超級大風暴,我亞貴講咗無數次,禍起於林鄭呢條仆街。

今日滔天怨氣嘅香港,就係林鄭下令全副武裝嘅黑警喺全港九濫打濫捕年青人及學生,而變得更暴更亂。睇電視,路人甲乙丙丁接受訪問,均指責林鄭係罪無可恕;末督彭定康亦毫無保留地直言林鄭做法瘋狂。

香港人現在處於大分裂狀態,非黃即藍,唔准中立嘅青色。今日敵我分明嘅香港,人人首要任務係上facebook unfriend唔同色嘅人,連夫妻、父子都冇情講,unfriend之後,仲要block埋佢,咁樣先至安心兼順氣。

另一個怪現象,就係酒樓酒吧冇晒生意。原本已經冇人喺周末敢出街,食肆全行吊緊命,再加上如今香港人已經冇可能一家人,甚至乎一班朋友飯聚,因為氣氛愈來愈凝重,同枱變反枱。

氣氛凝重係因為要提防,提防同枱之上又有黃又有藍。只要言語稍一不慎,場面就會尷尬或者火爆起來,一頓飯有鮑參翅肚,都冇胃口食落肚,最後掃興收場。

呢種掃興,最弊係事前唔可能預料,因為從前唔談政治或冇政治立場嘅人,突然都好進取,唔講政治簡直食唔落飯。

唯一仍然可約到飯局嘅,就只有同色人種。不過,最傷感者,乃係有啲本來經常一起吃飯嘅朋友,突然少了兩個人,一問,告知:「佢哋都係X色㗎」,於是幾十歲嘅人就好似中小學生那樣玩杯葛,連我亞貴都因此唔見咗幾個老友。

聽落何等幼稚,但大部分香港人從未經歷政治鬥爭,跟朋友割席仲覺得自己好正義,甚至幾有型。

上個月我亞貴喺香港跟舊同學吃飯,黃、藍、青都有,好在都係理性之人,對於亂局雖然各有睇法、各持己見,但還不至於反臉收場。反而說到特首,更加出奇地意見一致,人人怨氣沖天。

哈哈,原來林鄭條仆街才是團結香港嘅力量,只要一講起佢,唔理係黃還是藍,女抑或男,竟然可以摒棄成見,馬上團結起來,槍口向着同一個目標屌佢老味。

唉,反送中示威浪潮整整四個月嘅今日,香港已經充滿失望、無奈、憤怒、憎厭、仇恨、疲憊、無力。想當年,香港人曾經可以不分藍黃、不分你我,同笑、同哭、守望相助,呢種獅子山精神,慘被林鄭搞到魂飛魄散!

我要留言

請輸入你的評論!
請在這裡輸入你的名字