0

住喺美國真幸福,有職業籃球及美式足球賽可以俾我哋球迷即場欣賞,除咗可以睇到精彩嘅賽事及耀眼嘅球星之外,更可以喺比賽休息時段,注視青春奔放、熱情洋溢嘅啦啦隊鬼妹仔嘅撩人舞姿,真係令人心曠神怡㗎!

美國嘅啦啦隊,有好多嘅故事唔係人 人都知道,不如等我亞貴講吓故啦。

嗱,喺20世紀初期,花旗女子大學生能夠參加嘅體育活動並唔多,於係便有女大學生加入啦啦隊嘅行列。第二次世界大戰爆發,年輕嘅男子都奔赴戰場,啦啦隊嘅成員幾近九成由女子出任。到咗50年代,更使用綵球手搖花作出舞動,令觀眾更目不暇給。

要進入NFL及NBA嘅啦啦隊,美麗加健康當然係首要條件,但舞蹈能力、適應唔同風格嘅表演都係重要條件。能夠加入當然係無上光榮嘅事,但多數隊員頂多只能做3年,3年之後便要自謀出路,只能留下最美嘅青春記憶。

雖然入隊只能待3年,但能夠成為職業球隊嘅啦啦隊成員已係美國高中和大學女孩嘅夢想,因為既可以接觸到身價非凡嘅球星,亦可以喺場邊欣賞球賽,更可以令自己變成明星,讓世人注目。不過,球隊啦啦隊嘅背後卻有着鮮為人知嘅辛酸。

2010年之前,NBA啦啦隊員嘅薪金都係保密嘅,但喺2010年美國有媒體報道,佢哋嘅薪金係以時薪來算,平均收入係每場比賽大概50至100元之間,少過執盤碗。從賽前熱身到比賽結束係6小時,所以平均工資係相對地低,甚至有揾笨之嫌。當然,報道刊出之後受到關注了,薪金便提高兩倍以上。

NBA及NFL有明文規定啦啦隊女郎唔能夠和球員談戀愛,認為如果談戀愛嘅話,球員便會喺球場上為咗討好喺場上看球嘅女郎,為咗演嘢,可能做出更多危險動作。另外,如果和球員談戀愛而分手,又愛上另一球員嘅話,容乜易整隊球隊全部係襟兄弟?咁搞法,想贏波就難了。

事實上,除咗職業啦啦隊,各地學校有自己嘅啦啦隊比賽,仲有地區性比賽,更有世界各國嘅比賽。今年,由國際啦啦隊聯盟主辦嘅「世界啦啦隊比賽」(World Cheerleading Championships)於4月喺佛州迪士尼世界舉行,中華台北隊便獲得銅牌;奪得冠軍嘅係衞冕嘅美國隊,加拿大隊則以黑馬姿態獲得亞軍,我亞貴都有去捧場㗎!